Sjálfið

Að virða og rækta líkamlegt ástand sitt er í raun útvíkkun á því að virða og rækta innra sjálfið. Sú ríka tenging sem er milli líkama og sálar er órjúfanleg. Í starfi mínu sem þjálfari hef ég oft orðið vitni af þvi að líkamsrækt getur orðið eins konar vakning á andlegum þáttum í lífi manneskju og öfugt.

Samband okkar við jörðina og náttúruna er líka hluti af þessu ferli. Það hvernig við getum nærst af jörðinni og afurðum hennar er í raun grundvöllur lífskrafts mannsskepnunnar. Ef við vanvirðum líkama okkar með lélegri fæðu (líkamleg eða hugarfarsleg) svarar líkami okkar með alls kyns kvillum. Ef við gleymum að hlusta og skynja þá missum við tenginguna og þá erum við síður líkleg til að finna hið nauðsynlega jafnvægi sem þarf til að finna fyrir orku jarðar og orku sjálfsins.

Það að komast í tengingu við sína eigin orku, sjálfið, og skilja að sama ljós skín innra með okkur öllum er andleg uppljóstrun sem getur einungis skilað okkur meiri lífsfyllingu.

Gleðilegan sunnudag!