Smurning á kerfið

Fólk spyr mig oft hvaða olía sé best til inntöku sem fæðubótarefni...og svarið við því er, að mínu mati, að skipta reglulega um olíu. Taka einn mánuð í hörfræolíu, skipta svo í lýsi eða omega 3 o.s.frv. Einu sinni var lýsi það eina sem við þekktum en nú er tíðin önnur og margar gæðaolíur í boði. Svo er líka hægt að nota olíur eins og kókosolíu og ólífuolíu í staðinn fyrir smjör og smjörlíki í bakstri, mæli með því að prófa það, miklu miklu hollara. Helstu olíur eru:

Jurtaolíur:
Hörfræolía (Mjög góð, kaupi þessa frá Sollu)
Kókosolía (Nota hana til steikingar og í bakstur. Er umdeild..?)
Ólífuolía (Veljið first cold pressed og extra virgin auðvitað. Best á salöt, má ekki steikja uppúr henni - mistök margra)
Sesamolía
Sólblómafræolía (Góð til steikingar)

Fiskiolíur:
Venjulegt þorskalýsi(Best fyrir börnin)
Hákarlalýsi
Ufsalýsi (Hærra magn af A og D vítamínum)
Omega 3(unnin úr fiski sem er auðugur af ómega 3 fitusýrum)

Svo eru auðvitað til hinsar ýmsu blöndur af olíum. Ég var að byrja að taka Udo´s Oil 3 6 9 núna sem er svona blönduð olía sem inniheldur allt þetta nauðsynlegasta og hún lofar góðu - vel smurð núna Takið 1-2 matskeiðar af olíu á dag.

Bæ í bili, Addý

Smá um tónlistina mína. Er að hlusta á hann Ismael Lo núna, hann er geggjaður - tékkið á þessu lagi, mikill tregi (eins og ég er þekkt fyrir) http://www.youtube.com/watch?v=7lTHiObYX1o

Eitrið sem við erum að gefa börnunum okkar

Þar sem ég er mikil áhugamanneskja um næringu og matseld skellti ég mér á matreiðslunámskeið hjá Maður Lifandi í gær. Námskeiðið heitir heilsukostur og er ein kvöldstund. Við mamma fórum saman(alltaf að reyna að smita fjölskylduna af "dellunni" minni) og lærðum sko margt og mikið. Og ætla ég að skrifa um það hérna á næstu dögum og jafnvel að henda inn uppskriftum fyrir ykkur ef þið verðið stillt - svona þegar ég er búin að prófa þær og gera að mínum eigin. Á námskeiðinu var fjallað almennt um holla matargerð og svona trix til þess að gera hollan mat góðan og bara aðgengilegan. Því oft miklar fólk fyrir sér að breyta og prófa nýja hluti í eldhúsinu og held ég að það sé mest þekkingarleysi/tímaleysi. Auðvelt að gera það sem maður kann...ekki satt.

En eitt að því sem sló mig, þó svo ég hafi þannig séð vitað það, var umfjöllunin um sætuefnið aspartam. Aspartam átti upphaflega að banna í Bandaríkjunum en út af einhverri óskiljanlegri pólitík var það leyft. Þetta efni er algjört eitur og það versta er, er að það er í ótrúlega mörgu af því sem við gefum börnunum okkar á hverjum degi. Þar ber fyrst að nefna skyr, jógúrt, dagmál, kvöldmál eða hvað sem þetta nefnist allt saman, þ.e.a.s. mjólkurvörur sem eru merktar sykurskertar eru uppfullar af þessu efni. Svo eru þessar vörur auglýstar sem heilsuvörur. Þetta eru hálfgerð svik því þar fyrir utan er meiri hlutinn af öðrum mjólkurvörum uppfullar af sykri. Þetta hefur lýðheilsustofnun verið að benda á, sem er mjög jákvætt. Fleiri vörur sem innihalda aspartam eru t.d. gos og tyggjó og aðrar sykurskertar vörur. En bara gerið það fyrir mig, passið að hafa ekki aspartam hluta af ykkar daglegu fæðu og sérstaklega ekki barnanna ykkar.

Kv. Addý

Basískt fæði

"Nýjasta" (er reyndar hundgamalt) æðið í líkamsræktarbransanum er svokallað ph-diet. En það snýst um að jafna ph-stig líkamans. Hlutlaust eigum við að vera 7 í ph-sýrustig (svona eins og Nivea sápan) en eins og fólk borðar í dag er algengt að fólk sé með súra(e.acid) flóru. Það þýðir að ph-stigið er alltof hátt. Þá er talið að ofneysla á sykri, rauðu kjöti, hvítu hveiti, mjólkurvörum og áfengi o.fl. til lengri tíma geri það að verkum að líkaminn nái ekki að jafna sýrustigið. Afleiðingar þess eru þá flóra þar sem veirur/bakteríur/sýkingar eiga auðveldar uppdráttar. En ph-kúrinn svokallaði snýst þá um að fara á basískt fæði til þess að snúa þessu ferli í rétta átt. Hér fyrir neðan er linkur ef þið hafið meiri áhuga:

http://www.puls.is/xodus.aspx?id=30

http://www.himneskt.is/Forsida/Frodleikurspjall/Greinar/MeiraumGreinar/116

Meira síðar... 

Addý

Topp 5 - mataræði

1. Tileinkaðu þér hreint mataræði. Forðastu unnin matvæli, aukaefni, litarefni, sætuefni o.s.frv. Hreinn matur er t.d. ferskt kjöt, fiskur, kjúklingur, egg, grænmeti, ávextir(ferskir og þurrkaðir), kornmeti (t.d. hýðis eða brún hrísgrjón, gróf heilsubrauð, haframjöl og ósykraðar múslíblöndur), hnetur o.s.frv.

   

2. Veldu gróft og forðastu fínt. Veljum spelt, heilhveiti, hýðishrísgrjón, brún hrísgrjón o.s.frv.og forðumst hvítan sykur, hvítt hveiti, hvít hrísgrjón o.s.frv.

3.  Fjöldi máltíða. Borðaðu 5-6 máltíðir á dag. Uppistaðan er 3 aðalmáltíðir: morgunmatur, hádegismatur og kvöldmatur og svo 2-3 minni máltíðir. Aldrei að borða sig alveg pakksaddann

4. Vatn, vatn, vatn og aftur vatn. Besti drykkur í heimi. Drekka 2-3 lítra af vatni á dag.

5. Skipuleggja sig vel á virkum dögum og hafa svo einn "nammi"dag í viku.

   

Hafið að gott,
Addý

Meira um hugarfar

Verð að segja ykkur aðeins meira um hugarfar. Það er ótrúlegt afl í því að tileinka sér jákvætt og hvetjandi hugarfar. Í gegnum mannshugann fara tugir þúsunda hugsana á einum degi, mig minnir um 60 þús., en frá degi til dags eru þetta að jafnaði 95% sömu hugsanirnar aftur og aftur. Dálítið mikil endurtekning það... En prófið að hlusta á ykkur sjálf - hvað er ég að segja við sjálfan mig á hverjum degi? Tileinkum okkur virka hlustun. Hvað erum við að hugsa um þegar við erum í rútínunni okkar, t.d. þegar við erum að keyra í vinnuna eða bursta tennurnar á morgnana? Erum við hvetjandi og þakklát í hugsun eða erum við alltaf að rífa okkur niður og telja okkur trú um að við séum ekki hæf. Ef hið síðara er tilfellið, þá er kominn tími til að taka til...ekki satt? Þetta á við um alla hluta lífs okkar, ekki bara líkamsrækt. Það sem við teljum okkur trú um að við séum, það er það sem við erum og verðum.

Gleðilegan sunnudag,
Addý

Heilbrigt hugarfar - byrjaðu í dag

Til þess að vera í toppformi þarf einstaklingur að tileinka sér topphugarfar. Því er svo mikið til í orðunum "við erum það sem við hugsum". Það að tileinka sér eða lifa heilbrigðum lífstíl er fyrst og fremst háð hugfari okkar. Við getum allt sem við ætlum okkur og höfum tekið ákvörðun um 

Margir upplifa það að vera alltaf á leiðinni í ræktina en komast einhvern veginn aldrei. Þá heyrir maður hinar ýmsu afsakanir eins og t.d. að hafa ekki tíma. Oft vill það verða að þegar við viljum gera eitthvað nýtt, breyta lífi okkar eða byrja á einhverju nýju, að við frestum því. Æi bíðum aðeins, ég ætla fyrst að klára skólann eða ég ætla byrja eftir jól eða ég tek þetta með trompi eftir sumarfríið. Við finnum einhverja frábæra afsökun til að bíða aðeins. En til hvers að bíða? Lífið er of stutt til að sóa því í frestandi og hamlandi hugsanir. Ég er ekkert að segja að allir eigi að hendast í ræktina. Heldur einungis að hvetja ÞIG að byrja að hreyfa þig ef það er eitthvað sem þig langar til að gera. Við vitum öll sjálf best hvort þið þurfum á því að halda. Líkamar okkar eru hannaðir til þess að hreyfa sig og þeim mun meira sem við notum líkamann þeim mun meira finnum við fyrir lífinu - það er a.m.k. mín reynsla

Hendum því út hamlandi og afsakandi hugsunum og framkvæmum. Ekki hugsa of mikið, hvort eða hvenær þú ætlar að byrja í ræktinni - bara drífðu þig á stað.

Hlakka til að sjá þig.

Addý

Og þá hófust skrifin...

Velkomin á bloggið mitt 

Ég starfa sem einkaþjálfari í World Class Laugum og ætla að nota þessa síðu til að skrifa um heilsu, heilbrigðan lífstíl og næringu. Öll getum við bætt líf okkar á einhvern hátt og fræðslan um líkamsrækt og næringu virðist aldrei vera nóg í þjóðfélagi sem einkennist af kyrrsetu og hvers kyns aukaefna-óhollustu. Þannig langar mig til að hafa áhrif og hvetja fólk til að tileinka sér bætt hugfar, meiri hreyfingu og miklu betri næringu. Vona að þið njótið vel.

Kveðja,
Addý